السلام عليكم ورحمة الله -سؤالي يا شيخي عن سحر تعطيل الزواج .هل في نوع من انواع السحر بهذا الاسم وفعله بنفس معنى الاسم .قريت علي اعراضه وعلى رقية خاصة به .ونبي نقول يا شيخي اني عندي بعض الاعراض وهي رغم ان اغلبية الناس تقول اني حلوة وهادية وبنت عيلة ومحترمة والحمد لله لكن من الي وصلت لسن الزواج لليوم مجاش للحوش الا خطيب واحد بس ومولاش والسبب غير معروف.مقتنعة ان النصيب من عند الله ومش اعتراض على حكم الله لكن نبي نوضحلك يا شيخي حاجة موجودة فياوهي اني نبي نتزوج لكن لما نسمع حد يبي يجي يخطبني والا معجب بيا سواء رجل او مراة لرجل قريبها نضايق هلبة ونبدا ندور على سبب يبعدهم عليا ويكرههم فيا ويخليهم يبطلو ونصلي استخارة على هذا الشخص وعلى أمل انه يغير رايه طبعا بدون من نسبب اي شي يسئي لعيلتي او لاخلاقي و ممكن من 10 سنين لو مش اكثر ندعي لربي يوالحمد لله وبنستمر ندعي ان يرزقني بنصيب بموصفات معينةوكلي يقين بان الله سبحانه وتعالى كريم مجيب.فلم نسمع ان حد بغير هالموصفات بيتقدم ويخطبني نقول لا مش هو نصيبي ومنعرفش هل الي ندير فيه من عند الله وسبب لانهم مش نصيبي والا لاني ضعيفة الايمان ونقنع في نفسي بالشي هذا و نبي نوضحلك شي ثاني اني عندي باستمرار كسل وعدم رغبة في الاستحمام مع اني والحمد لله مش وسخة ومش ممكن تشم عليا ريحة شين وكذلك نتكاسل في الصلاة واحيانا كثيرة اقضي جميع الاوقات مع بعض مع اني نحاول نجاهد نفسي ديمة ومرات ننجح ومرات لا .وبالنسبة للرقية هل صح فكرة اني لازم نقرا قرآن في اوقات معينة وايام معينة بارقام معينة .مع العلم باني كنت مصفحة في يوم من الايام واستعنت لفك هذا التصفيح بشخص حسب راي جميع الناس انه تقي ويخاف الله ولا يستعمل الا القرآن في اعماله والحق لم ارى منه ما يريب.اسفة للاطالة وارجوك افدني افادك الله وجزاك كل خير هل اني مسحورة والا مجرد وساوس وفي مرة يا شيخ حلمت بمرآة في حوشنا وخدت شاربة لماما من مكان معين في حوشنا وقتلي هادي لوحيها فيها السحر ومشت لمكان ثاني في الحوش وطلعت شي مش مدكراته زي الكتاب من مكتبةقتلي حتى هذا لوحيه فيه السحر الشاربة موجودة فعلا والمكان نعرفه وصح لكن الشي الثاني منعرفاش مع اني المكان صح وهي مكتبة موجودة في الحوش زي مشفتها في الحلم بالله عليك يا شيخي كلامي هلبة واسألتي هلبة لكن نبي نفهم ونرتاح ربي يريحك ويبارك فيك والسلام عليكم ورحمة الله وبركاته
الجواب
بسم الله الرحمن الرحيم
الحمد لله والصلاة والسلام على رسول الله وعلى آله وصحبه ومن والاه.
لعل ما تجدينه هو من آثار التصفيح والتصفيح هو من أنواع السحر والذي رقاك بالرقية الشرعية لا بأس أن تواصلي معه الرقية فقد يرفع الله بالرقيا والقرآن ما تجدينه ، والصلاة لا بد أن تصليها في أوقاتها فتأخير الصلاة عن أوقاتها والكسل عنها مصيبة كبيرة لا تعين على العلاج والله تعالى يقول:( فويل للمصلين الذين هم عن صلاتهم ساهون) ولعل إذا انصلحت صلاتك انصلح باقي أمرك فأكثري من نوافل الصلاة بالليل وتضرعي إلى الله بالدعاء فالأمر كله بيده لكن لا تكتفي بالدعاء وأنتى مقصرة في الصلاة وحافظي على ورد من القرآن كل يوم مع أذكار الصباح والمساء.
الصادق بن عبد الرحمن الغرياني
شوهدت 989 مرة